தேடல்

வந்த காரியம்

விரைந்து முடிந்ததால்...

முன்பதிவு செய்த

அரசுப் பேருந்துக்கு

முழுதாக நான்கு மணி நேரம்

மிச்சம் இருந்தது.

காலம் கடத்த...

படிக்கவும்

குடிக்கவுமாய் ஏற்பாடு

நண்பர்களிருவருக்கும்.

பாத்து பேரிடம் விசாரித்தால்

ஏழு பேர்

தெரியாது என்றார்கள்

மூன்று பேர்

நான் ஊருக்குப் புதுசுங்க!'

அதையும் மீறி

அலைந்து திரிந்து

ஒருவழியாகக் கண்டுபிடிக்க முடிந்தது

அடுத்த தெருவில் இருக்கும்

பொது நூலகத்தை!

நண்பனுக்குத்தான்

சிரமமே இல்லையாம்...

பேருந்து நிலையத்தின்

நுழைவு வாயிலிலும்

வெளியேறும் வாயிலிலும்

பிரதான சாலையிலும்

இன்னபிற இடங்களிலுமாய்

அரசு மதுக் கடைகள்!